“Salto del pasto” e “Tiro dela cinghia” xe due sport dove i cantierini del 3. maj sta diventando campioni olimpici. Non bastava che de anni in qua, de quando che i xe sta “compradi” dal Uljanik, i gaveva dale 1.500 ale 2mila kune in meno in paga de quei de Pola (stessa anzianità, stessa qualifica, stesse ore de lavor); non bastava che i ghe ga sgrafignà oltre 500 milioni; non bastava che i ghe ga portà via quasi tuti i ordegni. No, non bastava. I li ga portà proprio ala fame.
El 3. maj, un cantier che ga ricevù 8 premi internazionali “Nave dell’anno” (el Uljanik gnanche uno!); che co era la guera el xe andà quasi a pico perché i faceva le autoblindo e i saldava lamierini sui autobus per trasportar i soldati, senza gaver mai ciapà un soldo; dove le navi che se fa xe le uniche al mondo che el Lloyd assicura per 40 anni; dove se ga fato tute le ringhiere che ga servì co xe venudo el papa e tante robe ancora. Un cantier de dove se finanziava (in parte) anche el Rijeka, el Primorje e tante altre picie squadre, come anche tanti progeti in cità e in Region.
Qualchedun ga deciso che nol deve esister più. Prima i lo ga munto come una muca (anzi pegio, a quela ti ghe devi lassar un bic’ de carne, se ti vol che la te dia ancora late); dopo i ga deciso de scaziar via quanta più gente. Ma i ga fato i conti senza la forza de volontà dei “trećemajci”, ligadi al cantier dove ga lavorà i padri, noni, anche bisnoni. E chi non li vol più insiste, noi ghe dà la paga de 6 mesi, ormai 7.
Ma noi ga fato i conti con i fiumani, con la gente, la picola gente che ga un cor enorme. E sta picola gente cossa ga fato? I se ga organizado per ingrumar roba de magnar, ma anche saponi e polvere de lavar, perfin panuze per i pici fioi. Ala domanda de dar chi cossa che pol ga risposto anche certe aziende (che ga potudo dar molto de più), ma stringeva proprio el cor, veder el vecio pensionato col baston che portava el sachetto con un chilo de farina, disendoghe a chi ingrumava “Me dispiase, non posso dar de più”.
Contenti, anche se i se sente un bic’ umiliadi, già più volte i “trećemajci” se ga messo in fila per ciapar el pacheto de magnar. Anche per radio i ga voludo ringraziar tuti quei che li sta aiutando. Ma gnanche in questa “vale dela fame” noi ga perso la solidarietà che sempre i ga gavudo. Perché non va tuti a cior el pacheto: fra de lori i se ga messo dacordo che chi che non ga fioi e la moglie ciapa la paga, opur chi che ga fioi già grandi e sposadi, non se mete in fila, perché “lassemo i pacheti a chi che ga fioi, che ghe ocore molto de più”. Uno solo de lori ga deciso de meterse in fila, ma co el vien fori el se mete da parte e el speta un altro per darghe el suo pacheto. Sto altro xe el colega che ga adotado i nipoti, quando el fratel e la cognata xe morti in un incidente de auto. E adesso de fioi el ghe ne ga sei.
L’agonia del 3. maj par non finir. Ma i dixe che la ora più nera xe quela prima del’alba. Speremo che sia le 5 passade.